‘Absurde’ aanklag teen 270
2012-08-31 23:48 --- Philip de Bruin
Die nasionale vervolgingsgesag (NVG) is gister uit alle oorde gekap oor sy besluit om 270 Marikana-mynwerkers van moord aan
te kla ná die skietdood van 34 van hul kollegas. Die NVG het hom beroep op ’n stuk wetgewing wat die apartheidsregering
destyds ná die Sharpeville-slagting ook gebruik het. Dit is “absurd”, “gek”, “bisar” en ’n “misbruik van die strafreg” bestempel.
Selfs Jeff Radebe, minister van justisie, was verward en het die NVG gevra om hom onmiddellik van ’n verslag te voorsien oor
waarom die vervolging ingestel is. “Die NVG se besluit het ongetwyfeld ’n gevoel van skok, paniek en verwarring in die
betrokke gemeenskap en die land as geheel veroorsaak. Ek wil duidelikheid hê oor die besluit.”
Die 34 is deur die polisie doodgeskiet tydens ’n oproerige byeenkoms van stakende mynwerkers. Om die 270 aangeklaagdes se
vervolging te regverdig, het die NVG gebruik gemaak van die ou (maar steeds geldende) regsreël van “gemeenskaplike doel”.
Dit is wanneer ’n groep beskuldigdes saam verantwoordelik gehou word vir ’n misdaad.
Dit is juis dít wat regskenners soos proff. Pierre de Vos, Marinus Wiechers en Tom Coetzee “stomgeslaan” het.
De Vos het gesê die hele vervolging is ’n misbruik van die strafreg.
“Hoe op aarde sal die NVG ooit kan bewys dat die aangeklaagdes ’n gemeenskaplike doel gehad het om hul medewerkers te vermoor?
’n Gemeenskaplike doel met wie – die polisie? Dit is mos heeltemal belaglik.”
Hy meen die NVG kan die aanklag van moord dalk as ’n dekmantel gebruik om die aangeklaagdes in die tronk te hou omdat
borgtog nie maklik aan beweerde moordenaars toegestaan word nie. Die 270 verskyn Donderdag weer in die hof.
Wiechers het gesê die vervolging het duidelik ’n verskuilde agenda: om nie aansien te verloor nie. “Die hele vervolging is
absurd en regtens onhoudbaar. Die beste wat ’n mens kan sê, is dat die werkers moontlik ’n gemeenskaplike doel gehad
het om openbare geweld te pleeg, maar móórd, en dit nogal op hul medewerkers? Dit is vergesog.”
Coetzee, ’n strafregkenner, het gesê die vervolging slaan hom dronk. “Geen hof sal daarvoor val nie.”
Bantu Holomisa, UDM-leier, het in ’n ope brief aan pres. Jacob Zuma die vervolging as “bisar” beskryf. “Dit is ironies dat die
mense wat die snellers getrek het, vry rondloop terwyl die slagoffers agter tralies sit.”
Sowel hy as Cosatu het geëis dat die vervolging gestaak word hangende die verslag van die kommissie van ondersoek na die geweld.
Cosatu het bygevoeg dat hy “absoluut woedend” is.
Debbie Schafer, die DA se woordvoerder oor justisie, het gesê die NVG se besluit dui óf op “?’n gebrek aan oordeel óf ’n
onbehoorlike politieke agenda aan die NVG se kant”.
http://www.beeld.com/Suid-Afrika/Nuus/Absurde-aanklag-teen-270-20120831
Index
